Дзяцінства вядомага французскага спевака Клёда Франсуа прайшло ў 1950-ыя гг. у Егіпце, дзе ён жыў з маці, сястрой і даволі аўтарытарным бацькам. Пасля Суэцкага крызісу сям’я апынулася ў Францыі. Клёд пастанавіў прысвяціць сябе музыцы, што давяло да роспачы ягонага бацьку, які бачыў сына банкаўскім працаўніком. Пасля павольнага старту да спевака прыйшоў першы поспех з песняю "Belle, belle, belle". Сустрэча з прадзюсарам Полам Ледэрманам надала новае вымярэнне ягонай кареры. Фільм - гісторыя жыцця вядомага французскага спевака 1960-ых і 1970-ых гг. Клёда Франсуа на мянушку Клёклё аж да ягонай трагічнай гібелі 11 сакавіка 1978 г. ва ўзросце 39 гадоў.